ខេត្តសៀមរាប :អាជ្ញាធរជាតិអប្សរា គ្រោងបញ្ចប់ការងារជួសជុល ច្រាំងកសិណខាងជើងមុខប្រាសាទអង្គរវត្ត ប្រវែងចំនួន២០ម៉ែត្រ បន្ថែមទៀតនាចុងឆ្នាំ២០២២ខាងមុខ ដើម្បីធានាឱ្យច្រាំងនេះមាន ភាពរឹងមាំនិងសោភ័ណភាពស្រស់ស្អាត។ លោកស្រី នង បូរ៉ាវី បុរាណវិទូ នៃនាយកដ្ឋានអភិរក្សប្រាសាទក្នុងឧទ្យានអង្គរ និងបុរាណវិទ្យាបង្ការ ជាប្រធានការដ្ឋានជួសជុលច្រាំងកសិណអង្គរវត្ត ជ្រុងខាងជើង បានឱ្យដឹងថា គម្រោងជួសជុលច្រាំងកសិណខាងជើង មុខប្រាសាទអង្គរវត្ត ដំណាក់កាលទី៧ មានប្រវែងចំនួន២០ម៉ែត្រជាបន្តទៀត លើការងារជួសជុលពង្រឹងគ្រឹះ និងរៀបកាំជណ្តើរពីថ្មបាយក្រៀម ព្រមទាំងត្រៀមរៀបកាំជណ្តើរធ្វើពីថ្មភក់បុរាណតាមលំនាំដើមឡើងវិញ។ លោកស្រីបន្តទៀតថា ចាប់តាំងពីអំឡុងខែមីនា ឆ្នាំ២០២២ មកដល់ពេលនេះ ដំណើរការជួសជុល សម្រេចបានប្រមាណ៤០ភាគរយហើយ លើការងារជួសជុលពង្រឹងគ្រឹះនៃបាតច្រាំងកសិណ រៀបកាំជណ្តើរពីថ្មបាយក្រៀមថ្មី ជំនួសថ្មបាយក្រៀមចាស់ពុកផុយខូចខាតទាំងអស់ឡើងវិញបាន៧កាំ ព្រមទាំងបានរក្សាទម្រង់ដើមរបស់លូបុរាណ ដោយប្រើថ្មបាយក្រៀមថ្មី ជំនួសថ្មបាយក្រៀមចាស់ដែលពុកផុយនៅផ្នែកខាងមុខជាប់នឹងមាត់ច្រាំងកសិណ ហើយត្រៀមនឹងរៀបកាំជណ្តើរធ្វើពីថ្មភក់ចំនួន៤កាំជាបន្តទៀត។ លោកស្រីបញ្ជាក់ទៀតថា ជំហានដំបូង ក្រុមការងារបានធ្វើកំណាយស្រាវជ្រាវ ប្រទះឃើញលូបង្ហូរទឹកបុរាណ ដែលមានទំនាក់ទំនងពីកសិណទឹកប្រាសាទអង្គរវត្តទៅនឹងត្រពាំងសេសនៅមានស្ថានភាពល្អ។ ជាមួយគ្នានោះ ក្រុមការងារក៏បានបិទទំនប់ទឹក ដើម្បីសម្រួលដល់ការងារជួសជុលគ្រឹះច្រាំងកសិណ ធ្វើសម្រង់ប្លង់ថ្ម ដែលជ្រុះធ្លាក់ចូលទៅក្នុងច្រាំង ព្រមទាំងរុះរើថ្មដោយប្រើកៅឡាក់អូសចេញពីច្រាំងខាងក្រោមឡើងទៅច្រាំងខាងលើ លាងសម្អាត ចុះបញ្ជីថ្ម និងជួសជុល មុននឹងយកមករៀបនៅទីតាំងដើមវិញផង។ ក្នុងនោះគម្រោងជួសជុលច្រាំងកសិណខាងជើងនៃមុខប្រាសាទអង្គរវត្ត បានចាប់ផ្តើមតាំងពីខែមីនា ឆ្នាំ២០២២ ហើយគ្រោងនឹងបញ្ចប់នៅចុងឆ្នាំ២០២២ ខាងមុខ។ សំឡេង៖យើងចាប់ផ្តើមតាំងពីឆ្នាំ២០១៣មក រហូតដល់ឆ្នាំ២០២២នេះ អាជ្ញាធរជាតិអប្សរាយើង បានជួសជុលប្រវែង១៤៣ម៉ែត្រហើយ ដោយឡែកនៅក្នុងឆ្នាំ២០២២នេះ យើងបន្តជួសជុល២០ម៉ែត្រហ្នឹង គិតទាំង១៤៣ម៉ែត្រហ្នឹង គម្រោងរបស់យើងក្នុងឆ្នាំ២០២២នេះចាប់ផ្តើម នៅក្នុងខែ៣ ហើយយើងគ្រោងនឹងបញ្ចប់នៅបំណាច់ឆ្នាំ២០២២ហ្នឹង។ហើយការងារដែលយើងបានធ្វើនេះ គឺបានរៀបកាំជណ្តើរថ្មបាយក្រៀម រហូតដល់កាំទី៧ហើយ ដែលមានពីរជួរទន្ទឹមគ្នា បន្ទាប់ពីយើងបញ្ចប់កាំទី៧ហ្នឹង យើងនឹងរៀបថ្មភក់ចាស់ ដែលយើងរើយកទៅទុក ហ្នឹង យើងរៀបត្រឡប់មកវិញ បន្ទាប់ពីយើងបានជួសជុលថ្មដែលបែកបាក់ហ្នឹង។ លោកស្រី នង បូរ៉ាវី បុរាណវិទូ ក៏បានលើកឡើងពីបញ្ហាប្រឈមសម្រាប់ការងារជួសជុលកសិណនេះថា ដោយសារការដ្ឋានជួសជុលនៅជាប់នឹងមាត់ទឹក គឺត្រូវចំណាយពេលវេលាមួយចំនួនដើម្បីបិទទំនប់ទឹក ធ្វើយ៉ាងណាឱ្យជាប់ល្អ ព្រោះត្រូវការជួសជុលពង្រឹងគ្រឹះជាចាំបាច់។ បញ្ហាប្រឈមមួយទៀតគឺនៅអំឡុងពេលធ្វើការងារ ក៏មានជ្រាបទឹក ហើយត្រូវបូមទឹកចេញជាប្រចាំ។ កសិណផ្នែកខាងលិចនៃប្រាសាទអង្គរវត្ត ជាទីតាំងដែលភ្ញៀវទេសចរជាតិ និងអន្តរជាតិ និយមមកផ្តិតយករូបភាព ប្រាសាទអង្គរកំពូលប្រាំដ៏ស្រស់ស្អាត។ នៅពេលការជួសជុលរួចរាល់ជាស្ថាពរ នឹងលើកសោភ័ណច្រាំងកសិណ ស្រស់ស្អាតទ្វេឡើង ហើយរក្សាបាននូវស្នាដៃដូនតាបានយូរ អង្វែងជាច្រើនជំនាន់ទៅមុខទៀតផង។ សូមជម្រាបថា ចាប់តាំងពីឆ្នាំ២០១៣ រហូតមកដល់ឆ្នាំ២០២២ អាជ្ញាធរជាតិអប្សរាបានជួសជុលច្រាំងកសិណអង្គរវត្ត ជ្រុងខាងជើង សរុបបានប្រវែង១៤៣ម៉ែត្រ៕
![](https://static.information.gov.kh/rails/active_storage/representations/eyJfcmFpbHMiOnsibWVzc2FnZSI6IkJBaHBBOWZIQXc9PSIsImV4cCI6bnVsbCwicHVyIjoiYmxvYl9pZCJ9fQ==--2b16cf86179a5577338afc69dcdeac1dec27acd7/eyJfcmFpbHMiOnsibWVzc2FnZSI6IkJBaDdCam9MY21WemFYcGxTU0lNT1RBd2VEWXdNQVk2QmtWVSIsImV4cCI6bnVsbCwicHVyIjoidmFyaWF0aW9uIn19--70cbddbba2e46c7ca8ac0c1f8b8316d88752e16d/CDF7C9F8-93D5-444B-A5A6-B8ADACA.jpeg)
![](https://static.information.gov.kh/rails/active_storage/representations/eyJfcmFpbHMiOnsibWVzc2FnZSI6IkJBaHBBOVBIQXc9PSIsImV4cCI6bnVsbCwicHVyIjoiYmxvYl9pZCJ9fQ==--9207588bc113fff9901c091c5b13d93aa61aa350/eyJfcmFpbHMiOnsibWVzc2FnZSI6IkJBaDdCam9MY21WemFYcGxTU0lNT1RBd2VEWXdNQVk2QmtWVSIsImV4cCI6bnVsbCwicHVyIjoidmFyaWF0aW9uIn19--70cbddbba2e46c7ca8ac0c1f8b8316d88752e16d/EB020C82-1B08-4E8B-A6A8-92A9FB6.jpeg)
![](https://static.information.gov.kh/rails/active_storage/representations/eyJfcmFpbHMiOnsibWVzc2FnZSI6IkJBaHBBOVRIQXc9PSIsImV4cCI6bnVsbCwicHVyIjoiYmxvYl9pZCJ9fQ==--6c69738b962ce78a1f92664f1a34b1afc8a083cc/eyJfcmFpbHMiOnsibWVzc2FnZSI6IkJBaDdCam9MY21WemFYcGxTU0lNT1RBd2VEWXdNQVk2QmtWVSIsImV4cCI6bnVsbCwicHVyIjoidmFyaWF0aW9uIn19--70cbddbba2e46c7ca8ac0c1f8b8316d88752e16d/0A6F8A92-0CF2-4593-9C8E-E55020B.jpeg)
![](https://static.information.gov.kh/rails/active_storage/representations/eyJfcmFpbHMiOnsibWVzc2FnZSI6IkJBaHBBOVhIQXc9PSIsImV4cCI6bnVsbCwicHVyIjoiYmxvYl9pZCJ9fQ==--d8da915209cd9d4df0d11b947a2ef8d0e4a5f5aa/eyJfcmFpbHMiOnsibWVzc2FnZSI6IkJBaDdCam9MY21WemFYcGxTU0lNT1RBd2VEWXdNQVk2QmtWVSIsImV4cCI6bnVsbCwicHVyIjoidmFyaWF0aW9uIn19--70cbddbba2e46c7ca8ac0c1f8b8316d88752e16d/B7BEDD7A-F9D0-4956-A460-D57FE48.jpeg)
![](https://static.information.gov.kh/rails/active_storage/representations/eyJfcmFpbHMiOnsibWVzc2FnZSI6IkJBaHBBOWpIQXc9PSIsImV4cCI6bnVsbCwicHVyIjoiYmxvYl9pZCJ9fQ==--6d6228f03429bf641b8f20157bbb98977c3d4475/eyJfcmFpbHMiOnsibWVzc2FnZSI6IkJBaDdCam9MY21WemFYcGxTU0lNT1RBd2VEWXdNQVk2QmtWVSIsImV4cCI6bnVsbCwicHVyIjoidmFyaWF0aW9uIn19--70cbddbba2e46c7ca8ac0c1f8b8316d88752e16d/5BAFDA2F-2E90-422D-8698-4DA3B20.jpeg)
![](https://static.information.gov.kh/rails/active_storage/representations/eyJfcmFpbHMiOnsibWVzc2FnZSI6IkJBaHBBOUxIQXc9PSIsImV4cCI6bnVsbCwicHVyIjoiYmxvYl9pZCJ9fQ==--989d006119946581c15621e40b2572cf3b8825c7/eyJfcmFpbHMiOnsibWVzc2FnZSI6IkJBaDdCam9MY21WemFYcGxTU0lNT1RBd2VEWXdNQVk2QmtWVSIsImV4cCI6bnVsbCwicHVyIjoidmFyaWF0aW9uIn19--70cbddbba2e46c7ca8ac0c1f8b8316d88752e16d/202093FC-354D-4D68-94C2-6100584.jpeg)
![](https://static.information.gov.kh/rails/active_storage/representations/eyJfcmFpbHMiOnsibWVzc2FnZSI6IkJBaHBBOUhIQXc9PSIsImV4cCI6bnVsbCwicHVyIjoiYmxvYl9pZCJ9fQ==--63023f7a2b292c560d24a10a70b641f28ec7c878/eyJfcmFpbHMiOnsibWVzc2FnZSI6IkJBaDdCam9MY21WemFYcGxTU0lNT1RBd2VEWXdNQVk2QmtWVSIsImV4cCI6bnVsbCwicHVyIjoidmFyaWF0aW9uIn19--70cbddbba2e46c7ca8ac0c1f8b8316d88752e16d/BDD25FC8-CBA8-404F-AEB3-A5BDB90.jpeg)
0 Reviews:
Post a Comment