Tuesday, October 4, 2022

មជ្ឈមណ្ឌលត្រួតពិនិត្យគុណភាពផលិតផលកសិកម្មមុនការនាំចេញត្រូវបានបង្កើតឡើងនៅអាកាសយានដ្ឋានសុវណ្ណភូមិ

អ្នកទស្សនា: Views



(ភ្នំពេញ)ថ្ងៃទី០៤ ខែតុលា ឆ្នាំ២០២២ អនុស្សរណៈនៃកិច្ចព្រមព្រៀង (MOA) សម្រាប់ការបង្កើតមជ្ឈមណ្ឌលត្រួតពិនិត្យគុណភាពមុនការនាំចេញសម្រាប់ផលិតផលកសិកម្មត្រូវបានអនុម័ត។ MOA នេះត្រូវបានចុះហត្ថលេខាដោយក្រសួងដឹកជញ្ជូន និងក្រសួងកសិកម្មរបស់ប្រទេសថៃ ដែលក្រសួងទាំងពីរនេះកំពុងកំណត់គោលដៅពង្រីកចំនួន ២០% នៃការនាំចេញកសិផល។

រដ្ឋមន្ត្រីក្រសួងដឹកជញ្ជូនថៃ លោក សាក់សាយ៉ាម ឈីដឆប និងអនុរដ្ឋមន្ត្រីក្រសួងកសិកម្មថៃ លោកស្រី ម៉ាណាន់យ៉ា ថៃសេត បានធ្វើជាអធិបតីក្នុងពិធីចុះហត្ថលេខាលើអនុស្សរណៈនេះ។ ក្រសួងទាំងពីរនឹងសហការគ្នាបង្កើតប្រព័ន្ធត្រួតពិនិត្យគុណភាពមុនការនាំចេញសម្រាប់ទំនិញកសិកម្ម។

លោក សាក់សាយ៉ាម បាននិយាយថា ក្រសួងទាំងពីរបានដឹងអំពីសារៈសំខាន់នៃភស្តុភារក្នុងទិដ្ឋភាពនៃការត្រួតពិនិត្យគុណភាពផលិតផលកសិកម្ម។ ដើម្បីឱ្យស្តង់ដារផលិតផលកសិកម្មរបស់ប្រទេសថៃត្រូវបានទទួលស្គាល់ដោយសហគមន៍អន្តរជាតិ ប្រព័ន្ធត្រួតពិនិត្យមុនការនាំចេញកំពុងត្រូវបានបង្កើតឡើង។ ក្រៅពីប្រព័ន្ធត្រួតពិនិត្យ មជ្ឈមណ្ឌលត្រួតពិនិត្យគុណភាព និងស្តង់ដារសម្រាប់ផលិតផលកសិកម្មកំពុងត្រូវបានបង្កើតឡើងនៅអាកាសយានដ្ឋានសុវណ្ណភូមិ។ កិច្ចការនេះ គឺសំដៅដល់ការកាត់បន្ថយចំពោះការបដិសេធផលិតផលកសិកម្មនៅប្រទេសគោលដៅ និងកាត់បន្ថយបរិមាណទំនិញមិនស្តង់ដារ។

យោងតាមរដ្ឋមន្ត្រីក្រសួងដឹកជញ្ជូនបានឱ្យដឹងថា ក្រុមហ៊ុន Airports of Thailand Plc. នឹងរៀបចំកន្លែង និងឧបករណ៍ចាំបាច់សម្រាប់មជ្ឈមណ្ឌលត្រួតពិនិត្យនេះ។ ក្រសួងកសិកម្ម តាមរយៈនាយកដ្ឋានកសិកម្មរបស់ខ្លួន នឹងធ្វើការត្រួតពិនិត្យទំនិញ និងចេញវិញ្ញាបនបត្រពាក់ព័ន្ធ។ ដំណាក់កាលទីមួយនៃកិច្ចសហប្រតិបត្តិការក្រោម MOA នេះ ត្រូវបានគេរំពឹងថានឹងត្រូវបានអនុវត្តនៅអាកាសយានដ្ឋានសុវណ្ណភូមិចាប់ពីថ្ងៃទី១ ខែវិច្ឆិកា។ កិច្ចសហប្រតិបត្តិការនេះនឹងត្រូវបានពង្រីកទៅកាន់អាកាសយានដ្ឋានផ្សេងទៀតនាពេលអនាគត ដោយផ្អែកទៅលើលទ្ធផលពីដំណាក់កាលដំបូងនេះ។

អនុរដ្ឋមន្ត្រីក្រសួងកសិកម្មថៃ លោកស្រី ម៉ាណាន់យ៉ា បាននិយាយថា មជ្ឈមណ្ឌលនៅអាកាសយានដ្ឋានសុវណ្ណភូមិនឹងផ្តល់អត្ថប្រយោជន៍ដល់អ្នកនាំចេញបន្លែ ផ្លែឈើ និងផ្កាស្រស់។ បច្ចុប្បន្ន ផលិតផលទាំងនេះប្រមាណ ១៥០ ០០០តោនត្រូវបាននាំចេញក្នុងមួយឆ្នាំ។ លោកស្រី ម៉ាណាន់យ៉ា បាននិយាយថា តួលេខនេះត្រូវបានគេរំពឹងថានឹងកើនឡើង ២០% នាពេលអនាគត ដោយសារទំនុកចិត្តរបស់អ្នកទិញបរទេសចំពោះទំនិញនាំចេញរបស់ថៃ។ លោកស្រីបាននិយាយបន្ថែមថា នាយកដ្ឋានកសិកម្មនឹងចងក្រងព័ត៌មានលម្អិតនៃប្រតិបត្តិការដោយមជ្ឈមណ្ឌលនេះ ហើយបង្ហាញវានៅក្នុងសប្តាហ៍មេដឹកនាំសេដ្ឋកិច្ច APEC (AELW)។ ការណែនាំអំពីប្រតិបត្តិការរបស់មជ្ឈមណ្ឌលនេះទៅកាន់មេដឹកនាំ APEC ត្រូវបានគេជឿជាក់ថា នឹងជះឥទ្ធិពលជាវិជ្ជមានដល់ទំនុកចិត្តទៅលើការនាំចេញកសិផលរបស់ប្រទេសថៃ៕(ប្រភព NNT បកប្រែដោយលោក យា ចិន្តាខន្តី) សម្រួលផ្សាយដោយ៖ dara

រដ្ឋបាលខេត្តព្រះវិហារ បើកកិច្ចប្រជុំពិនិត្យ និងពិភាក្សាស្ដីពីវឌ្ឍនភាព នៃការគ្រប់ គ្រងដីរដ្ឋ

អ្នកទស្សនា: Views

 

ព្រះវិហារ៖  ឯកឧត្តម គីម រិទ្ធី អភិបាលខេត្តព្រះវិហារ បានអញ្ជើញដឹកនាំកិច្ចប្រជុំគណៈកម្មាធិការគ្រប់គ្រងដីរដ្ឋថ្នាក់ខេត្ត ដែលពិធីនេះធ្វើឡើងនៅសាលប្រជុំសាលាខេត្តព្រះវិហារ ក្រោមវត្តមានចូលរួមពីសំណាក់ ឯកឧត្តម អភិបាលរងខេត្ត លោកប្រធានមន្ទីរ-អង្គភាពពាក់ព័ន្ធ អភិបាលក្រុង-ស្រុក មន្ត្រី ជំនាញរដ្ឋបាលសាលាខេត្ត និងមេឃុំ-មេភូមិ ជាច្រើនរូបទៀត ។

ឯកឧត្តម គីម រិទ្ធី អភិបាល ខេត្ត បានស្នើដល់សមាជិកគណៈកម្មាធិការគ្រប់គ្រងដីរដ្ឋទាំងអស់ ត្រូវចូលរួមពិភាក្សា និងចូលរួមជាគំនិតយោបល់ល្អៗ និងសំណូមពររបស់សមាជិកក្នុងអង្គប្រជុំ ដើម្បីជាធាតុចូលក្នុងការពិភាក្សារក ដំណោះស្រាយពី បញ្ហាប្រឈមនានា ដែលកើតមានឡើងនាពេលកន្លងមក ឱ្យទទួលបានលទ្ធផលកាន់តែល្អប្រសើរ ។

កិច្ចប្រជុំបានប្រព្រឹត្តទៅដោយមានការចូលរួមពិភាក្សាទៅលើរបាយការណ៍មួយចំនួនដូចជា ការចុះពិនិត្យទីតាំងសម្រាប់គម្រោង បែងចែកដីដើម្បី សង្គមកិច្ច និងការអភិវឌ្ឍសេដ្ឋកិច្ចដំណាក់កាលទី៣ ស្ថិតនៅភូមិស្វាយ និងភូមិរំដោះស្រែ ឃុំរំដោះស្រែ ស្រុកជាំក្សាន្ត និងពិភាក្សាទៅលើ ករណីប្រជាពលរដ្ឋសុំកាត់ឆ្វៀលដី ស្ថិតនៅក្នុងតំបន់កូនភ្នំ ភូមិភារកិច្ច សង្កាត់ប៉ាលហាល ក្រុង ព្រះវិហារ និងបែងចែកដីចំនួន ៨៦ហិកតា ស្ថិតនៅក្នុងតំបន់កូនភ្នំ ភូមិភារកិច្ច សង្កាត់ប៉ាលហាល ក្រុងព្រះវិហារ ព្រមទាំងពិភាក្សារបាយការណ៍ស្តីពី ការបែងចែកដីព្រលានយន្តហោះ ស្ថិតនៅភូមិហ្មសែត សង្កាត់ប៉ាលហាល ក្រុងព្រះវិហារ។  

បន្ថែមពីនេះ ឯកឧត្តមអភិបាលខេត្ត ក្នុងនាមប្រធានគណៈកម្មាធិការគ្រប់គ្រងដីរដ្ឋថ្នាក់ខេត្ត បានស្នើឱ្យអាជ្ញាធរក្រុង-ស្រុកត្រូវគ្រប់គ្រង និងការពារដីរដ្ឋ ឱ្យមានប្រសិទ្ធភាពខ្ពស់ ពិសេសមន្ទីរជំនាញត្រូវសហការជាមួយអាជ្ញាធរក្រុង-ស្រុក និងអ្នកពាក់ព័ន្ធបន្ថែមទៀត ។ ជាមួយនេះ ត្រូវពន្លឿនការដោះស្រាយបញ្ហាទំនាស់ដីធ្លីក្នុងភូមិសាស្ត្រខេត្តព្រះវិហារ ប្រកបដោយតម្លាភាព ដោយឈរលើគោលការណ៍ច្បាប់ និងលិខិតបទដ្ឋាននានា ដើម្បីជាឧត្តមប្រយោជន៍ជាតិ និងប្រជាជន ៕


Monday, October 3, 2022

រដ្ឋសភាបើកសម័យប្រជុំ លើកទី៨ នីតិកាលទី៦​ ដោយលើកយករបៀបវារៈ ចំនួន ៥ មកពិភាក្សា និងអនុម័ត

អ្នកទស្សនា: Views


ភ្នំពេញ៖ នាព្រឹកថ្ងៃចន្ទ​ ទី៣​ ខែតុលា ឆ្នាំ២០២២នេះ រដ្ឋសភានៃព្រះរាជាណាចក្រកម្ពុជា បានបើកសម័យប្រជុំ លើកទី៨​ នីតិកាលទី៦ ក្រោមអធិបតីភាពដ៏ខ្ពង់ខ្ពស់ សម្ដេចអគ្គមហាពញាចក្រី ហេង សំរិន ប្រធានរដ្ឋសភា ដោយមានវត្តមានសមាជិកសមាជិការដ្ឋសភា ពេលចាប់ផ្តើមសម័យប្រជុំ ចំនួន ៩៣រូប។

របៀបវារៈសម័យប្រជុំរដ្ឋសភាលើកទី៨ នីតិកាលទី៦ មានចំនួន ៥ គឺ៖

១- ព្រះរាជសារព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ជូនសម័យប្រជុំរដ្ឋសភា លើកទី៨ នីតិកាលទី៦។

២- របាយការណ៍សង្ខេបស្តីពី សកម្មភាពការងាររបស់រដ្ឋសភាចន្លោះសម័យប្រជុំរដ្ឋសភាលើកទី៧ និងលើកទី៨ នីតិកាលទី៦។

៣- ការសម្រេចអំពីសុពលភាពនៃអាណត្តិ របស់បេក្ខជនជាប់ឆ្នោត ជាតំណាងរាស្រ្តនីតិកាលទី៦ នៃរដ្ឋសភា ចំនួន ២រូប៖

– ឯកឧត្តម ហេង ប៊ុនថាន់ ជាតំណាងរាស្រ្តមណ្ឌលខេត្តរតនគិរី ជំនួស ឯកឧត្តម ប៊ូ ឡាំ ដែលបានទទួលមរណភាព

– ឯកឧត្តម នុត ជា ជាតំណាងរាស្រ្តមណ្ឌលរាជធានីភ្នំពេញ ជំនួស ឯកឧត្តម ជៀប ស៊ីវន ដែលបានទទួលមរណភាព។

៤- ការបោះឆ្នោតជ្រើសតាំង៖

– ឯកឧត្តម ចាន់ យឿន ជាសមាជិកគណៈកម្មការមហាផ្ទៃ ការពារជាតិ និងមុខងារសាធារណៈ នៃរដ្ឋសភា

– លោកជំទាវ ស៊ុន សាភឿន ជាសមាជិកគណៈកម្មការកិច្ចការបរទេស សហប្រតិបត្តិការអន្តរជាតិ ឃោសនាការ និងព័ត៌មាន នៃរដ្ឋសភា។

៥- ការពិភាក្សា និងអនុម័តសេចក្តីព្រាងច្បាប់ស្តីពី ការអនុម័តយល់ព្រមលើពិធីសារទីបួន ស្តីពីវិសោធនកម្មកិច្ចព្រមព្រៀងវិនិយោគទូលំទូលាយអាស៊ាន។

មុននឹងចាប់ផ្តើមសម័យប្រជុំរដ្ឋសភាតាមរបៀបវារៈ អង្គសភាបានអនុម័តយល់ព្រមលើសមាសភាពលេខាធិការសម័យប្រជុំរដ្ឋសភា លើកទី៨​ នីតិកាលទី៦ ចំនួន ៣រូប ដែលមានរាយនាមដូចតទៅ៖ ១- ឯកឧត្តម ពេជ្រ ជីវ័ន អាយុ ៦៩ឆ្នាំ​ ២- ឯកឧត្តម សៀង ស៊ុតថង អាយុ ៧០ឆ្នាំ​ ៣- ឯកឧត្តម ស៊ូ ភិរិន្ទ អាយុ ៧០ឆ្នាំ៕ ប្រភព៖ ទទក សម្រួលផ្សាយដោយ៖ dara

សម្តេចតេជោ ហ៊ុន សែន៖ រាជរដ្ឋាភិបាលចាត់ទុកវិស័យឯកជន ជាក្បាលម៉ាស៊ីនរថភ្លើងនៃកំណើនសេដ្ឋកិច្ចជាតិ តាមរយៈបង្កើតការងារ និងចំណូលពន្ធ

អ្នកទស្សនា: Views



(ភ្នំពេញ)៖ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា នៅព្រឹកថ្ងៃទី៣ ខែតុលា ឆ្នាំ២០២២នេះ បានថ្លែងបញ្ជាក់ជាថ្មីថា រាជរដ្ឋាភិបាលបានចាត់ទុកវិស័យឯកជន ជាក្បាលម៉ាស៊ីនរថភ្លើងនៃកំណើនសេដ្ឋកិច្ចជាតិ តាមរយៈការបង្កើតការងារធ្វើជូនប្រជាពលរដ្ឋ និងបង់ពន្ធជូនរដ្ឋ។

សម្តេចតេជោ ហ៊ុន សែន បញ្ជាក់ថា នៅពេលដែលវិស័យឯកជនរីកចម្រើន នឹងជួយបង្កើតការងារជូនប្រជាជនកាន់តែច្រើន ហើយការបង់ពន្ធកាន់តែកើនខ្ពស់ សម្រាប់ជួយទ្រទ្រង់ដល់ការចំណាយរបស់រាជរដ្ឋាភិបាល។

សម្តេចនាយករដ្ឋមន្ត្រីបានបន្ថែមថា រាជរដ្ឋាភិបាលកម្ពុជានឹងបន្តជំរុញពង្រឹងការរីកចម្រើនវិស័យឯកជនក្នុងស្រុក ដើម្បីឲ្យកម្ពុជាមានអ្នករកស៊ីកាន់តែច្រើន សម្រាប់ជួយដល់ប្រទេសជាតិ។

ការថ្លែងរបស់សម្តេចតេជោ ហ៊ុន សែន ធ្វើឡើងក្នុងឱកាសអញ្ជើញចែកសញ្ញាបត្រ ដល់និស្សិតវិទ្យាស្ថានវ៉ាន់ដា ជិត៤ពាន់នាក់ នាព្រឹកថ្ងៃទី១០ ខែតុលា ឆ្នាំ២០២២។

សម្តេចតេជោនាយករដ្ឋមន្ត្រីបានថ្លែងយ៉ាងដូច្នេះថា «វិស័យឯកជនរបស់យើងកំពុងពង្រឹកខ្លួនឡើង ដែលទាមទារនូវធនធានមនុស្ស សម្រាប់ការអភិវឌ្ឍន៍ យើងចាត់ទុកវិស័យឯកជន គឺជាក្បាលម៉ាស៊ីនរថភ្លើងនៃកំណើនសេដ្ឋកិច្ច ដូច្នេះធនធានមនុស្ស ដែលបានបណ្តុះបណ្តាល នៅតាមគ្រឹះស្ថានឧត្តមសិក្សានានា មួយផ្នែកធំត្រូវបានវិស័យឯកជនទទួលយកទៅធ្វើការ ដែលជាការម្ខាងដោះស្រាយការងារធ្វើឲ្យនិស្សិត និងម្ខាងទៀតដើម្បីការរីកចម្រើននៃក្រុមហ៊ុនខ្លួនឯង។ អ្នកខ្លះនិយាយថា ការរីកចម្រើនរបស់ក្រុមហ៊ុនខ្លួនឯង ជាផលប្រយោជន៍ឯកជន ត្រឹមត្រូវ ប៉ុន្តែអ្នកមិនត្រូវភ្លេចនូវចំណងទាក់ទងនានា រវាងវិស័យឯកជន ជាមួយនឹងសង្គមនោះទេ វិស័យឯកជនរីកធំធាត់កើនឡើង

 គឺជួយដោះស្រាយបញ្ហាសម្រាប់ សេដ្ឋកិច្ចរបស់ប្រទេស តាមរយៈដោះស្រាយការងារធ្វើ និងតាមរយៈនៃការបង់ពន្ធ។ វិស័យឯកជនកាន់តែខ្លាំង ការបង់ពន្ធកាន់តែច្រើន ហើយប្រាក់ដែលបានពីការបង់ពន្ធ យើងមានលទ្ធភាពធ្វើការវិនិយោគ ធ្វើផ្លូវថ្នល់ ប្រឡាយទឹក ធ្វើសាលារៀន ធ្វើមន្ទីរពេទ្យ ដំឡើងបៀវត្សជូនមន្ត្រីរាជការរបស់យើង»។

សម្តេចតេជោបានថ្លែងថា សម្តេចបានដឹកនាំធ្វើការកែទម្រង់ដោយផ្ទាល់ នៃសេដ្ឋកិច្ចរបស់កម្ពុជា ពីសេដ្ឋកិច្ចផែនការ ទៅសេដ្ឋកិច្ចទីផ្សារ ដែលនាំមកនូវការរីកចម្រើនរបស់វិស័យសេដ្ឋកិច្ចកម្ពុជាដូចសព្វថ្ងៃនេះ។

សម្តេចតេជោ ហ៊ុន សែន បានថ្លែងទៀតថា រយៈពេលជាង៣០ឆ្នាំមកនេះ ចាប់តាំងពីការធ្វើសេដ្ឋកិច្ចទីផ្សាររហូតមកដល់បច្ចុប្បន្ន រាជរដ្ឋាភិបាលកំពុងបន្តធ្វើសុក្រឹតកម្មសេដ្ឋកិច្ចទីផ្សារ ដែលមានន័យថា មកដល់បច្ចុប្បន្នកម្ពុជា មិនទាន់ដើរដល់ទីបញ្ចប់នៃការកែទម្រង់ ក្នុងវិស័យសេដ្ឋកិច្ចនៅឡើយទេ ដោយនៅខ្វះលិខិតបទដ្ឋានគតិយុត្តមួយចំនួន សម្រាប់អង្គការពាណិជ្ជកម្មពិភពលោក៕

Saturday, October 1, 2022

ផ្លូវល្បឿនលឿន​ភ្នំពេញ​-ក្រុងព្រះសីហនុ​ ចាប់ផ្តើមបើកឱ្យពលរដ្ឋប្រើប្រាស់សាកល្បង ដោយឥតគិតថ្លៃនៅព្រឹកនេះហើយ

អ្នកទស្សនា: Views



(ភ្នំពេញ​)៖​ ផ្លូវល្បឿនលឿនភ្នំពេញ-ព្រះសីហនុ មានប្រវែង ១៨៧.០៥គីឡូម៉ែត្រ ដែលបានតភ្ជាប់ពីភូមិ១ សង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ ដល់ភូមិ១ សង្កាត់លេខ៣ ក្រុងព្រះសីហនុ ខេត្តព្រះសីហនុ នាព្រឹកថ្ងៃទី​០១​ ខែតុលា​ ឆ្នាំ២០២២នេះ​ បានចាប់ផ្តើមបើកឱ្យប្រជាពលរដ្ឋប្រើប្រាស់សាកល្បង ដោយឥតគិតថ្លៃរយៈពេល១ខែ ចាប់ពីព្រឹកនេះហើយ។

ផ្លូវល្បឿនលឿន-ភ្នំពេញព្រះសីហនុ គឺជាផ្លូវល្បឿនលឿនទី១ និងជាផ្លូវរបៀងយុទ្ធសាស្ត្រសំខាន់បំផុតនៅកម្ពុជា ជួយកាត់បន្ថយ ពេលវេលាធ្វើដំណើរពីរាជធានីភ្នំពេញ ទៅផែសមុទ្រក្រុងព្រះសីហនុ ពីចំនួនប្រាំម៉ោងមកត្រឹមតែពីរម៉ោងប៉ុណ្ណោះ និងជួយកាត់បន្ថយតម្លៃភស្តុភារកម្មផងដែរ។

សូមជម្រាបដែរថា​ នៅលើផ្លូវល្បឿនលឿន ភ្នំពេញ-ព្រះសីហនុ មានកន្លែងឈប់សម្រាក និងផ្តល់សេវាកម្មចំនួន៤ទីតាំង នៅតាមបណ្តោយផ្លូវ ដែលទីតាំងនីមួយៗមានចំណតយានយន្ត ស្ថានីយប្រេងឥន្ធនៈ បន្ទប់ទឹក អាហារដ្ឋាន និងកន្លែងផ្តល់សេវាកម្មផ្សេងៗ។​ ទីតាំងទាំង៤ រួមមាន៖ ទីតាំងកំពង់ស្ពឺ (គ.ម 40), ទីតាំងកំពង់ស្ពឺខាងលិច (គ.ម 63), ទីតាំងកំពង់សិលា (គ.ម 109) និងទីតាំងព្រៃនប់ខាងលិច (គ.ម 156)។

ផ្លូវល្បឿនលឿននេះ ត្រូវបានបែងចែកជា៣គន្លងទៅ និង៣គន្លងមក ដែលក្នុងនោះរួមមាន៖

* គន្លងផ្លូវសម្រាប់ចរាចរណ៍ធម្មតា៖ អ្នកបើកបរយានយន្តគ្រប់ប្រភេទ ត្រូវបើកបរតាមគន្លងផ្លូវខាងស្ដាំនៃផ្លូវល្បឿនលឿនដែលជាគន្លងផ្លូវសម្រាប់ចរាចរណ៍ធម្មតា។

* គន្លងផ្លូវសម្រាប់ជែង៖ ក្នុងករណីសុំជែង អ្នកបើកបរយានយន្តត្រូវឱ្យសញ្ញាប្ដូរទិសខាងឆ្វេងយ៉ាងតិច ៥វិនាទី ហើយត្រូវងាកទៅគន្លង ផ្លូវខាងឆ្វេងនៃផ្លូវល្បឿនលឿន ដែលជាគន្លងផ្លូវសម្រាប់ជែង។ នៅពេលជែងផុត អ្នកបើកបរត្រូវឱ្យសញ្ញាប្ដូរទិសខាងស្ដាំ ដើម្បីងាកចូលគន្លងផ្លូវ សម្រាប់ចរាចរណ៍ធម្មតាវិញ។

ក្នុងករណីចរាចរណ៍មមាញឹក អ្នកបើកបរយានយន្តអាចប្រើប្រាស់គន្លងផ្លូវទាំង២បាន ដោយឡែករថយន្តធុនធ្ងន់ ត្រូវប្រកាន់យកគន្លងផ្លូវ សម្រាប់ចរាចរណ៍ ធម្មតាដដែល។ ក្នុងករណីនេះយានយន្តនៅតាមគន្លងផ្លូវណាមួយបើកបរលឿនជាង មិនចាត់ទុកជាការជែងឡើយ ហើយយានយន្តដែលស្ថិតនៅក្រោយគេ ត្រូវប្រើភ្លើងសញ្ញាអាសន្នជាដំណឹង។

* គន្លងផ្លូវសម្រាប់ឈប់បន្ទាន៖ គន្លងផ្លូវសម្រាប់ឈប់បន្ទាន់ មិនត្រូវបានអនុញ្ញាតឱ្យយានយន្តទូទៅប្រើប្រាស់ឡើយ លើកលែងតែយានយន្តពន្លត់អគ្គិភ័យ យានយន្ត សង្គ្រោះរបស់មន្ទីរពេទ្យ យានយន្តនគរបាល យោធា កងរាជអាវុធហត្ថ យានយន្តថែទាំផ្លូវ ដែលកំពុងបំពេញភារកិច្ច និងយានយន្តដែលខូច ឬមានគ្រោះថ្នាក់ចរាចរណ៍ ឬមានករណីអាសន្ន។

ផ្លូវល្បឿនលឿន​នេះ​ បានការកំណត់ល្បឿនបើកបរ​» ល្បឿនទាបបំផុត(អប្បបរមា) និងលឿនបំផុត(អតិបរមា )​ដូចជា៖

ទី១៖​ ល្បឿន 60 - 120km/h រថយន្តគ្រួសារ/ធុនស្រាល

ទី២៖​ ល្បឿន 60 - 100km/h រថយន្តធុនធ្ងន់មិនមានសណ្តោងសឺម៉ីរ៉ឺម៉ក ឬម៉ូតូ500cc/27kWឡើងទៅ

ទី៣៖​ ល្បឿន 60 - 80km/h រថយន្តសណ្តោងសឺម៉ីរ៉ឺម៉ក ឬសណ្តោងយានដំណើរកំសាន្ត

ករណីផ្លូវកោងច្រកចូលចំហៀងទៅផ្លូវល្បឿនលឿន អ្នកបើកបរត្រូវបានកំណត់ឱ្យបើកបរត្រឹមតែ 40km/h ប៉ុណ្ណោះ រួចទើបត្រូវបង្កើនល្បឿនដល់ 60km/h។ ដោយឡែកកន្លែងដែលចាំបាច់ត្រូវបន្ថយល្បឿន ក៏ត្រូវបានដាក់នូវគំនូសរំញ័រ(Rumble Stripes) ដើម្បីដាស់តឿនដល់អ្នកបើកបរផងដែរ។

ផ្លូវល្បឿនលឿន​នេះដែរមានច្រកចេញ-ចូល ទាំងអស់ចំនួន៨ទីតាំងរួមមានដូចជា៖

*ច្រកទី១ ភ្នំពេញ (ផ្លូវកប់ស្រូវ) គីឡូម៉ែត្រ ៣

* ច្រកទី២ កំពង់ស្ពឺកើត គីឡូម៉ែត្រ ២៦

* ច្រកទី៣ កំពង់ស្ពឺលិច គីឡូម៉ែត្រ ៤៣

* ច្រកទី៤ ត្រែងត្រយឹង គីឡូម៉ែត្រ ៧៦

* ច្រកទី៥ កំពង់សិលា គីឡូម៉ែត្រ ១១៤

* ច្រកទី៦ ស្រែអំបិល គីឡូម៉ែត្រ ១៣៥

* ច្រកទី៧ ស្ទឹងហាវ គីឡូម៉ែត្រ ១៧២

* ច្រកទី៨ ព្រះសីហនុ គីឡូម៉ែត្រ ១៨២

សូមជម្រាបដែរថា​ ផ្លូវល្បឿនលឿន​នេះសាងសង់ដោយក្រុមហ៊ុន PPSHV Expressway Co., Ltd និងក្រុមហ៊ុនបុត្រសម្ព័ន្ធនៃ ក្រុមហ៊ុនសាជីវកម្មស្ពានថ្នល់ចិន (CRBC) និងត្រួតពិនិត្យ បច្ចេកទេសដោយក្រុមហ៊ុន MINCONSULT SDN. BHD. ប្រើរយៈពេលសាងសង់ ៤៨ខែ គ្រោងចំណាយថវិកាជិត ២ពាន់លានដុល្លារ សហរដ្ឋអាមេរិក មានគន្លងផ្លូវចំនួន៤គន្លង ទទឹងផ្លូវសរុប ២៤,៥ម៉ែត្រ មានផ្លូវបំបែកទិស ៧កន្លែង មានកន្លែងឈប់សម្រាកចំនួន ៣កន្លែង ចំណតរថយន្ត១កន្លែង មណ្ឌលប្រតិបត្តិការ និងថែទាំចំនួន ៤កន្លែង ស្ពានធំ និងស្ពានមធ្យមចំនួន៤០កន្លែង ស្ពានតូចចំនួន៥កន្លែង ដែលឆ្លងកាត់រាជធានីភ្នំពេញប្រមាណ ៨គីឡូម៉ែត្រ និងខេត្តចំនួន០៤បួន ក្នុងនោះ៖ ខេត្តកណ្តាលប្រវែង ៩,១ គីឡូម៉ែត្រ ខេត្តកំពង់ស្ពឺប្រវែង ៨០,៨ គីឡូម៉ែត្រ ខេត្តកោះកុងប្រវែង១,៩២ គីឡូម៉ែត្រ និងខេត្តព្រះសីហនុប្រវែង ៨៩,៨៩គីឡូម៉ែត្រ៕