ស្នងការខេត្តឧត្តរមានជ័យ នាំអំណោយនាយឧត្តមសេនីយ៍សន្តិបណ្ឌិត នេត សាវឿន និងអភិបាលខេត្ត ប្រគល់ជូននគរបាលព្រំដែនគោក ក្នុងឱកាសបុណ្យចូលឆ្នាំថ្មី

 

(ឧត្តរមានជ័យ)៖ ឧត្តមសេនីយ៍ទោ ហួត សុធី ស្នងការនគរបាលខេត្តឧត្តរមានជ័យ នៅថ្ងៃទី១០ ខែមេសា ឆ្នាំ២០២១នេះ បានចុះជួបសំណេះសំណាល សួរសុខទុក្ខ និងនាំយកនូវគ្រឿងឧបភោគបរិភោគ រួមទាំងថវិកា ដែលជាអំណោយរបស់នាយឧត្តមសេនីយ៍សន្តិបណ្ឌិត នេត សាវឿន អគ្គស្នងការនគរបាលជាតិ និងលោក ប៉ែន កុសល្យ ប្រធានគណៈបញ្ជាការឯកភាព ខេត្តឧត្តរមានជ័យ ចែកជូនកងកម្លាំងវរសេនាតូចនគរបាលការពារព្រំដែនគោក លេខ៧០២,៩០៥ កម្លាំងអន្តរាគមន៍ និងតម្រួតបទបញ្ជាចំណុះស្នងការដ្ឋាននគរបាលខេត្ត។

ក្នុងឱកាសនោះដែរ លោកឧត្តមសេនីយ៍ស្នងការ ក៏បានពាំនាំនូវមតិផ្តាំផ្ញើសាកសួរសុខទុក្ខពីសំណាក់លោកនាយឧត្តមសេនីយ៍សន្តិបណ្ឌិត អគ្គស្នងការនគរបាលជាតិ និងលោក ប៉ែន កុសល្យ ដល់កងកម្លាំងទាំងអស់ ដែលកំពុងតែបំពេញបេសកកម្មការពារតាមព្រំដែន ក៏ដូចជាកំពុងថែរក្សាសន្តិសុខ សណ្តាប់ធ្នាប់ នៅទូទាំងខេត្តឧត្តរមានជ័យ ទាំងមូល។

លោកឧត្តមសេនីយ៍ទោ ហួត សុធី ក៏បានណែនាំដល់កងកម្លាំងនគរបាលទូទាំងខេត្ត ត្រូវមានការប្រុងប្រយ័ត្នគ្រប់ពេលវេលា ដើម្បីជៀសអោយផុតពីជំងឺកូវីដ-១៩ ពិសេសត្រូវគោរពអនុវត្តអនុសាសន៍របស់សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា នូវវិធាnការ «៣ការពារ និង៣កុំ» ក៏ដូចជាការណែនាំរបស់ក្រសួងសុខាភិបាល ដើម្បីការពារកុំឱ្យឆ្លងជំងឺកូវីដ-១៩។

បន្ថែមពីនេះ លោកឧត្តមសេនីយ៍ទោ ក៏បានផ្តាំផ្ញើរដល់កងកម្លាំងនគរបាលនៅតាមក្រុង ស្រុក ដែលមានព្រំប្រទល់ជាប់ជាមួយខេត្តបន្ទាយមានជ័យ ខេត្តសៀមរាប និងខេត្តព្រះវិហារ ត្រូវយកចិត្តទុកដាក់អនុវត្តន៍បទបញ្ជារបស់ប្រមុខរាជរដ្ឋាភិបាល លើការបិទការធ្វើដំណើរឆ្លងកាត់ពីខេត្តមួយ ទៅខេត្តមួយ ជាបណ្តោះអាសន្នរយៈពេល១៤ថ្ងៃ ដើម្បីបង្ការការទប់ស្កាត់ ការរីករាលដាលនៃជំងឺកូវីដ-១៩ ពិសេសត្រូវណែនាំឱ្យប្រជាពលរដ្ឋមានការយល់ដឹងពីគោលបំណងនៃបទបញ្ជារបស់រាជរដ្ឋាភិបាល និងណែនាំឱ្យពួកគាត់ចេះការពារខ្លួនពីជំងឺកូវីដ-១៩ ផងដែរ៕