សាខាកាកបាទក្រហមកម្ពុជាខេត្ត បើកកិច្ចប្រជុំស្តីពីការចូលរួមយោបល់លើសេចក្តីព្រាងយុទ្ធសាស្ត្រ ឆ្នាំ២០២១-២០៣០

 កណ្ដាល: ថ្ងៃទី០៦ ខែសីហា ឆ្នាំ២០២១

នៅរសៀលថ្ងៃ១២រោច ខែទុតិយាសាឍ ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃព្រហស្បតិ៍ ទី០៥ ខែសីហា ឆ្នាំ២០២១ ឯកឧត្តម គង់ សោ    ភ័ណ្ឌ អភិបាលខេត្តកណ្តាល និង ជាប្រធានគណៈកម្មាធិការសាខាកាកបាទក្រហមកម្ពុជាខេត្ត បានអញ្ជើញដឹកនាំកិច្ចប្រជុំស្តីពី ការចូលរួមយោបល់លើសេចក្តីព្រាង យុទ្ធសាស្ត្រ ឆ្នាំ ២០២១-២០៣០ របស់កាកបាទក្រហមកម្ពុជា របស់សាខាកាកបាទក្រហមកម្ពុជាខេត្ត ជាមួយ សមាជិកសាខា អនុសាខាកាកបាទក្រហមកម្ពុជាក្រុង-ស្រុកទាំង១១ តាមអនឡាន(ZOOM)។

ឯកឧត្ដម គង់ សោភ័ណ្ឌ មានប្រសាសន៍ថា យុទ្ធសាស្ត្រឆ្នាំ២០២១-២០៣០ របស់ សាខាជាមគ្គុទ្ទេសក៏សម្រាប់ដំណើរផ្លូវក្នុងរយៈពេល១០ឆ្នាំបន្ត ហើយក្នុងនាមជាជំនួយការឱ្យអាជ្ញាធរសាធារណៈក្នុងវិស័យមនុស្សធម៌ អនុវត្តន៍សកម្មភាពនៅគ្រប់ស្ថានការណ៍ ក្នុងការបំពេញតួនាទី ស្របជាមួយយុទ្ធសាស្ត្រចតុកោណរបស់រាជរដ្ឋាភិបាល ដើម្បីកំណើនការងារ សមធម៌ និង ប្រសិទ្ធភាព៖ កសាងមូលដ្ឋានឆ្ពោះទៅសម្រេចចក្ខុវិស័យឆ្នាំ២០៣០ និងឆ្នាំ២០៥០ នៃរាជរដ្ឋាភិបាលកម្ពុជា។

ឯកឧត្តម អភិបាលខេត្ត បន្ថែមថា ដើម្បីបុព្វហេតុបេសកកម្មមនុស្សធម៌ ក្នុងការកាត់បន្ថយជនរងគ្រោះ និង ជនងាយរងគ្រោះដែលបង្កដោយគ្រោះមហន្តរាយ និងដើម្បីចូលរួមជាមួយរាជរដ្ឋាភិបាល ក្នុងការលើកកម្ពស់ជីវភាពរស់នៅរបស់ប្រជាជន អនុសាខាក្រុង-ស្រុកទាំងអស់ ត្រូវខិតខំកៀរគរស្វែងរកសប្បុរសជន ដើម្បីជួយឧបត្ថម្ភដល់អនុសាខា ដើម្បីជាទុនក្នុងការជួយដល់ប្រជាពលរដ្ឋ ដែលជួបគ្រោះមហន្តរាយផ្សេងៗ ឱ្យបានទាន់ពេលវេលា នៅក្នុងមូលដ្ឋានក្រុង-ស្រុករៀងៗខ្លួន ៕

(ប្រភពៈ រដ្ឋបាលខេត្តកណ្ដាល )